ನರಗುಂದದಲ್ಲಿ ಪ್ರೀತಿಸಿ ಮದುವೆಯಾದ ಪತಿಯನ್ನೇ ಕೊಂದ ಪತ್ನಿ..!

ಸಮಾನತೆಯ ಸೂರ್ಯ

(ಡಾ. ಬಿ. ಆರ್. ಅಂಬೇಡ್ಕರ್ ಅವರಿಗೆ ಅಕ್ಷರ ನಮನ)

ಮಣ್ಣಿನ ಮೊಗದಲಿ ಮಿಂಚಾಗಿ ಮೂಡಿದನು

ಮಹಿಮೆಯ ಮಹಾದೀಪವ ಹಚ್ಚಿದನು |

ಹೀನತೆಯ ಹೆಪ್ಪುಗಟ್ಟಿದ ಹಿಮಗಿರಿಗಳ ನಡುವೆ

ಹೆಮ್ಮೆಯ ಕೆನ್ನಾಲಗೆಯ ಜ್ವಾಲೆಯಾಗಿ ಹೊತ್ತಿದನು || ೧ ||

ಬಾಲ್ಯದ ಕಹಿಯುಣಿಸಿದ ಬವಣೆಯಲಿ ಬೆಂದು

ಸೋತು ಬೀಳದೆ ಸಿಡಿದು ನಿಂತವನು |

ಸತತ ಸಾಧನೆಯ ಶ್ರದ್ಧೆಯ ಪಥದಲಿ

ಶಿಕ್ಷಣದ ಸಪ್ತಗಿರಿಗಳನ್ನೇ ಏರಿದನು || ೨ ||

"ಶಿಕ್ಷಣವೇ ಶಕ್ತಿ"ಯೆಂಬ ಕ್ರಾಂತಿಯ ಬೀಜವ

ಶೋಷಿತರ ಬರಿದಾದ ಎದೆಯಲಿ ಬಿತ್ತಿದನು |

ಅರಿವೆಂಬ ಅಕ್ಷಯ ಜ್ಯೋತಿಯನು ಬೆಳಗಿಸಿ

ಜಾತಿಯ ಮಸಿಗತ್ತಲನು ಸೀಳಿ ಗೆದ್ದನು || ೩ ||

ಮಹೂವಿನ ಮಡಿಲಲಿ ಅರಳಿದ ಮಧುರ ಪುಷ್ಪ

ಮಹನೀಯ ಮಾನವತೆಯ ಸಾಕಾರ ಮೂರ್ತಿ |

ಕೊಲಂಬಿಯಾದ ಕಂಗಳಲಿ ಜ್ಞಾನದ ಚೈತನ್ಯವಾಗಿ

ಜಗದಗಲ ಹರಡಿದನು ತನ್ನ ಕೀರ್ತಿ || ೪ ||

ಲಂಡನ್ನಿನ ವಿದ್ವತ್ ಸಭೆಯಲಿ ಅತಿರಥನಾಗಿ

ಲೋಕದ ಜ್ಞಾನನಿಧಿಯನ್ನೇ ಲಭಿಸಿದನು |

ತನ್ನ ತೀಕ್ಷ್ಣ ಬುದ್ಧಿಯ ವಜ್ರಾಯುಧದಿಂದ

ಭುವಿಯಲಿ ಅಳಿಯದ ಮಹಿಮೆಯನು ಗೈದನು || ೫ ||

ಕಾಗದದ ಸಾಲುಗಳಲಿ ಕ್ರಾಂತಿಯ ಕಿಡಿ ಇರಿಸಿ

ಕಾನೂನಿನ ಭದ್ರಕೋಟೆಯನು ಕಟ್ಟಿದನು |

ಸಂವಿಧಾನವೆಂಬ ಉಜ್ವಲ ರೂಪದಿ ಭಾರತದಿ

ಸಮಾನತೆಯ ಸೂರ್ಯನಾಗಿ ಮೂಡಿ ಬಂದನು || ೬ ||

ಜಾತಿ-ಜಂಜಾಳದ ವಿಷವೃಕ್ಷದ ಬೇರುಗಳ

ಜಗದೆದುರು ಜಜ್ಜಿ ಪುಡಿಪುಡಿ ಮಾಡಿದನು |

ಮಾನವೀಯತೆಯೇ ಮಹಾಧರ್ಮವೆಂದು ಸಾರಿ

ಮೌಢ್ಯದ ಮಂಕುಬೂದಿಯನು ಹರಿಸಿದನು || ೭ ||

ಬುದ್ಧನ ದಮ್ಮದೀಪದ ಶಾಂತ ಬೆಳಕಲಿ

ಬಂಧನದ ಹಳೆಯ ಬಾಗಿಲನು ತೆರೆದನು |

ಸ್ವಾಭಿಮಾನದ ಸುದೀರ್ಘ ಹಾದಿಯಲಿ ನಡೆದು

ಸಮಾನತೆಯ ಸುಂದರ ಲೋಕವನು ಸೃಜಿಸಿದನು || ೮ ||

ಜನ್ಮದಿನದ ಈ ಸಂಭ್ರಮವು ಇಂದು

ಜಾಗೃತಿಯ ಜ್ಯೋತಿಯಾಗಿ ಎದೆಯಲಿ ಬೆಳಗಲಿ |

ಬಾಬಾಸಾಹೇಬರ ವಿಶ್ವವ್ಯಾಪಿ ಚಿಂತನೆಗಳು

ಅಖಿಲ ಬ್ರಹ್ಮಾಂಡದ ಅಣುವಿನಲಿ ಹರಡಲಿ || ೯ ||

ಅವನು ಬರಿ ವ್ಯಕ್ತಿಯಲ್ಲ, ಜ್ಞಾನದ ಮಹಾಸಾಗರ

ವಿಶ್ವದ ಶ್ರೇಷ್ಠ ಚಿಂತನೆಯ ಅಮರ ರೂಪವನು |

ನಮ್ಮ ಉಸಿರಿನಲಿ, ಹಸಿವಿನಲಿ ಸದಾ ಜೀವಿಸುವ

ಅವನೇ ನಮ್ಮ 'ನಿತ್ಯ ಸಮಾನತೆಯ ಸೂರ್ಯನು' || ೧೦ ||

ಅಮೀರನಾಯಕ (ಕಲ್ಲಿಗನೂರ) ಗದಗ

ಜೈ ಭೀಮ್!