ಅಸ್ಪೃಶ್ಯತೆ ನಿರ್ಮೂಲನೆಗೆ ಕಾನೂನು ಅರಿವು ಅಗತ್ಯ: ರೋಣ ತಹಶೀಲ್ದಾರ ಕೆ. ನಾಗರಾಜ
ಗದಗವಾಣಿ ಸುದ್ದಿಮೂಲ|
ಗಜೇಂದ್ರಗಡ:
ಸಮಾಜದಲ್ಲಿ ಸಮಾನತೆ ಮತ್ತು ಮಾನವೀಯ ಮೌಲ್ಯಗಳನ್ನು ಬಲಪಡಿಸಲು ಕಾನೂನು ಅರಿವು ಅತ್ಯವಶ್ಯಕ ಎಂದು ರೋಣ ತಹಶೀಲ್ದಾರ ಕೆ. ನಾಗರಾಜ ಹೇಳಿದರು.
ಗದಗ ಜಿಲ್ಲೆಯ ಗಜೇಂದ್ರಗಡ ತಾಲ್ಲೂಕಿನ ರಾಜೂರ ಗ್ರಾಮದಲ್ಲಿ ಕರ್ನಾಟಕ ಸರ್ಕಾರದ ತಾಲೂಕ ಆಡಳಿತ, ತಾಲೂಕ ಪಂಚಾಯತ ಹಾಗೂ ಸಮಾಜ ಕಲ್ಯಾಣ ಇಲಾಖೆ ರೋಣ ಇವರ ಸಂಯುಕ್ತ ಆಶ್ರಯದಲ್ಲಿ “ಅಸ್ಪೃಶ್ಯತೆ ನಿವಾರಣೆ (ನಾಗರಿಕ ಹಕ್ಕುಗಳ ಸಂರಕ್ಷಣಾ ಕಾಯ್ದೆ-1955 ಹಾಗೂ 1977ರ ನಿಯಮಗಳು) ಮತ್ತು ಪರಿಶಿಷ್ಟ ಜಾತಿ ಹಾಗೂ ಪರಿಶಿಷ್ಟ ಪಂಗಡದವರ ಮೇಲಿನ ದೌರ್ಜನ್ಯ ಪ್ರತಿಬಂಧ ಕಾಯ್ದೆ 1989 (ತಿದ್ದುಪಡಿ 2015 ಮತ್ತು 2016)” ಕುರಿತ ಕಾನೂನು ಅರಿವು ಕಾರ್ಯಾಗಾರ 2025-26 ಯಶಸ್ವಿಯಾಗಿ ನಡೆಯಿತು.
ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದ ಕೆ. ನಾಗರಾಜ ಅವರು, “ಅಸ್ಪೃಶ್ಯತೆ ಎಂಬುದು ಮಾನವೀಯತೆಗೆ ಕಳಂಕ. ಕಾನೂನುಗಳು ಕೇವಲ ಪುಸ್ತಕಗಳಲ್ಲಿ ಉಳಿಯದೇ, ಪ್ರತಿಯೊಬ್ಬರ ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು. ಹಕ್ಕುಗಳ ಅರಿವು ಇದ್ದರೆ ಮಾತ್ರ ಅನ್ಯಾಯಗಳಿಗೆ ತಕ್ಕ ಉತ್ತರ ಕೊಡಬಹುದು” ಎಂದು ಹೇಳಿದರು.
ತಾಲ್ಲೂಕು ಪಂಚಾಯತ ಕಾರ್ಯನಿರ್ವಾಹಕ ಅಧಿಕಾರಿ ಚಂದ್ರಶೇಖರ ಕಂದಕೂರ ಅವರು ಮಾತನಾಡಿ, “ಸರ್ಕಾರ ರೂಪಿಸಿರುವ ಕಾಯ್ದೆಗಳು ದುರ್ಬಲ ವರ್ಗದ ರಕ್ಷಣೆಗೆ ಬಲವಾದ ಆಯುಧ. ಜನರು ಅವುಗಳ ಸದುಪಯೋಗ ಪಡೆದು ಸಮಾಜದಲ್ಲಿ ಸಮಾನತೆಯನ್ನು ಸ್ಥಾಪಿಸಬೇಕು” ಎಂದು ತಿಳಿಸಿದರು.
ತಾಲ್ಲೂಕು ಸಮಾಜ ಕಲ್ಯಾಣ ಅಧಿಕಾರಿ ಗೀತಾ ಆಲೂರ ಅವರು, ಪರಿಶಿಷ್ಟ ಜಾತಿ ಮತ್ತು ಪಂಗಡದವರ ಹಕ್ಕುಗಳ ಕುರಿತು ವಿವರಿಸಿ, ಸರ್ಕಾರದಿಂದ ಲಭ್ಯವಾಗುವ ವಿವಿಧ ಸೌಲಭ್ಯಗಳನ್ನು ಜನರು ಬಳಸಿಕೊಳ್ಳಬೇಕು ಎಂದು ಮನವಿ ಮಾಡಿದರು.
ವಕೀಲರಾದ ಎಫ್.ಎಂ. ಬಸಲಾಪೂರ ಅವರು ಕಾನೂನುಗಳ ಕುರಿತು ಸಮಗ್ರವಾಗಿ ಉಪನ್ಯಾಸ ನೀಡಿ, “ದೌರ್ಜನ್ಯ ಎದುರಾದಲ್ಲಿ ತಕ್ಷಣ ದೂರು ದಾಖಲಿಸುವುದು, ಸಾಕ್ಷ್ಯ ಸಂಗ್ರಹಿಸುವುದು ಮತ್ತು ಕಾನೂನು ಸಹಾಯ ಪಡೆಯುವುದು ಬಹಳ ಮುಖ್ಯ” ಎಂದು ತಿಳಿಸಿದರು.
ಈ ಸಂದರ್ಭದಲ್ಲಿ ಗುರು ಮಹಾಂತೇಶ ಕಲಾತಂಡದಿಂದ ಜಾಗೃತಿ ಕಿರು ನಾಟಕ ಪ್ರದರ್ಶನ ನಡೆಯಿತು. ನಾಟಕದ ಮೂಲಕ ಅಸ್ಪೃಶ್ಯತೆ ವಿರುದ್ಧ ಬಲವಾದ ಸಂದೇಶವನ್ನು ನೀಡಲಾಯಿತು.
ಕಾರ್ಯಕ್ರಮವನ್ನು ಸಂಗಮೇಶ ಅಡಗತ್ತಿ ನಿರೂಪಿಸಿದರು. ಇಮಾಮಸಾಬ ವಸ್ತ್ರದ ಸ್ವಾಗತಿಸಿ, ವಂದಿಸಿದರು.
---
ಜಾಗೃತಿ ಮಾತುಗಳು:
➡️“ಅಸ್ಪೃಶ್ಯತೆ ವಿರುದ್ಧ ಹೋರಾಟ ನಮ್ಮೆಲ್ಲರ ಹೊಣೆ.”
➡️“ಕಾನೂನು ಅರಿವು ಇದ್ದರೆ ಅನ್ಯಾಯಕ್ಕೆ ತಲೆಬಾಗಬೇಕಾಗಿಲ್ಲ.”
➡️“ಸಮಾನತೆ, ಸಹಬಾಳ್ವೆ ಮತ್ತು ಮಾನವೀಯತೆ – ನಮ್ಮ ಸಮಾಜದ ಮೂಲ ಮೌಲ್ಯಗಳು.”
➡️“ದೌರ್ಜನ್ಯ ಕಂಡರೆ ಮೌನವಾಗಬೇಡಿ, ಕಾನೂನು ನೆರವನ್ನು ಪಡೆಯಿರಿ.”
*ಸಂದೇಶ* :
ಸಮಾಜದಲ್ಲಿ ಶಾಂತಿ, ಸಮಾನತೆ ಮತ್ತು ನ್ಯಾಯ ಸ್ಥಾಪನೆಗಾಗಿ ಪ್ರತಿಯೊಬ್ಬ ನಾಗರಿಕನು ಕಾನೂನುಗಳ ಅರಿವು ಪಡೆದು, ಅವುಗಳನ್ನು ಅನುಸರಿಸುವುದು ಅವಶ್ಯಕವಾಗಿದೆ.
Post a Comment